ತುಕಾರಾಮನ ಅಭಂಗಗಳು

ಇವು ತುಕಾರಾಮನ ಜೀವನ ಸಾಧನೆ ಚಿತ್ರಿಸುವ  ಬರೆಹ ಮಾಡುವ ಸಂದರ್ಭದಲ್ಲಿ ಅದರ ಅಗತ್ಯವನ್ನು ಭರಿಸಲು ಇಂಗ್ಲಿಶಿನಿಂದ ಅನುವಾದ ಮಾಡಿದವು. ಇವನ್ನು ಆ ಬರೆಹದಿಂದ ಪ್ರತ್ಯೇಕ ಮಾಡಿದರೂ ತನ್ನದೇ `ತನ'ವನ್ನು ಹೊಂದಿವೆ. ತುಕಾರಾಮನ ಕರ್ತೃತ್ವ ಶಕ್ತಿಯ ಪರಿಚಯ .ಇಲ್ಲಿ ನಮಗಾಗುತ್ತದೆ.
#

1
ಮಾತೇ ನನ್ನಲ್ಲಿ ಇರುವ ಸಿರಿಯು
ಮಾತೇ ನಾ ಉಟ್ಟ ತೊಟ್ಟ ಚೆಲುವು
ಮಾತೇ ನಾ ಉಂಡು ತಣಿದ ಹಸಿವು
ಮಾತೇ ನನ್ನಲ್ಲಾಡೊ ಜೀವದುಸಿರು
ಮಾತೇ ನಾ ನೀಡೊ ದಾನ ಸಂಪತ್ತು
ತುಕಾನ ಈ ಮಾತಿಗೆ ವಿಠ್ಠಲನೆ ಸಾಕ್ಷಿ
ಅವನ ಪೂಜಿಸುವೆ ಮಾತನ್ನೆ ಮುಡಿಸಿ

2
ಸಂತರು ಆಡಿದ ಮಾತನಾಡುತೀನಿ
ನನ್ನಂಥ ಗಮಾರ ಏಸು ತಿಳಿದಿವಿನಿ?
ವಿಠಲನ ಹೆಸರೆ ಹೇಳೋಕೆ ಬರಲ್ಲ
ನಾನ್ಯಾವ ನೀತಿ ನಿಂಗೆ ಹೇಳುತೀನಿ?
ಎಳೆಮಂಗಿನಂಗೆ ತೊದಲು ನುಡಿತೀನಿ
ನಿಂಗಿನ್ನು ನಂಜಾತಿ ಗೆಪ್ತಿ ಬಂದಿಲ್ವಾ?
ತುಕಾನಾಡೊ ಮಾತು ಆ ದೇವರು ಕೊಟ್ಟ
ಅವ ಮಾತ್ರ ಬಲ್ಲ ಅಂಥ ಮಾತಿನ ಗುಟ್ಟ

3
ಒಬ್ಬೊಂಟಿ ನಾನು ಈ ಶೂನ್ಯದಲ್ಲಿ
ನನಗಿಲ್ಲ ಯಾರೂ ಸಂಗಾತಿ ಇಲ್ಲಿ
ನೋಡೀಗ ಎಂಥ ಅಚ್ಚರಿ ನೋಡಾ
ಪರಮಾತ್ಮ ನನ್ನ ಹುಚ್ಚೆಬ್ಬಿಸಿದನಲ್ಲ!
ಅವನಾ ಮೈ ನನ್ನಲ್ಲಿ ಅಡಗಿಸಿದನಲ್ಲ
ನನಗಾಗಿ ಜೊತೆಗಾರ ಆಗಿರುವನಲ್ಲ!
ತುಕಾನ ನುಡಿಯಿದು ಇಲ್ಲಾ ಗೊತ್ತಿಲ್ಲ
ನಂದೇ ಭಾವನೆ ನನ್ನ ಹಾಳು ಮಾಡಿತಲ್ಲ!

4
ದಾವರ ದಾವರ ದಾವರ
ದಾವರಾನೆ ಕುಡಿದುಬಿಟ್ಟೆ
ಹಸಿವೂ ಹಸಿವೂ ಹಸಿವೂ
ಹಸಿವನ್ನೇ ನುಂಗಿಬಿಟ್ಟೆ
ನಂದೇ ಜೀವಾ
ಇಲ್ಲದಂಗಾಗಿಬಿಡ್ತು
ವಿಠ್ಠಲ ಕಂಡಾ
ನನ್ನಲ್ಲಿ ಚೊಕ್ಕ ಮನಸ್ಸನ್ನ
ಆಸೆಗಳಿಲ್ಲ
ಆಸೆಯ ಗಮಲಾನು ಇಲ್ಲ
ಕುಸಿದೋಯ್ತು ಮನಸು
ಅವಂದೇ ಪಾದಗಳಲ್ಲಿ
ಅವನೂ ಉಳಕೊಂಡು ಉಳಿದದ್ದು ಏನು?
ಇದಕಾಗೆ ಬದುಕು ತುಕಾ ಕಳದೋಗಿ ಬಿಡ್ತು.

5
ಯಾರಿಗೂ ಇಷ್ಟದವನಲ್ಲ
ಒಂಟಿ ಒಬ್ಬೊಂಟಿ
ತಲ್ಲಾಣಿಸಿತೋ
ಶೂನ್ಯವೇ ಲಬೊಲಬೊ ಹೊಯ್ಕೊಂಡು.
ನಡುಗಿಸಿತೋ
ಗುಂಪು ಗುಂಪುಗಳಲ್ಲಿ ಜೀವ ಜಂತು ಪ್ರಾಣಿ.
ಮೈ ನಡುಕ-ಭೀತಿ
ಕಣ್ಣು ಕಟ್ಟಿತೊ ಎಲ್ಲೆಲ್ಲು ಕತ್ತಲು
ಜಡ್ಡುಗಟ್ಟಿದೆನೆಲ್ಲೊ ಲಕ್ವಾ ಹೊಡೆದು.

ಮುಗ್ಗರಿಸಿ ಬಿದ್ದೆನೆಲ್ಲೊ ಮೆಳೆಗೆ
ಮುಳ್ಳು ಚುಚ್ಚಿತಲ್ಲಾ ಸಿಕ್ಕಸಿಕ್ಕಾ ಕಡೆಗೆ
ಕವಲೊಡೆದ ದಾರಿ ಸಾವಿರಾರು ಸಾಗಿ
ಕಳೆದುಕೊಂಡೆನೊ ನಾ ನಡೆದ ಹಾದಿ
ತತ್ತರಿಸಿ ಕುಸಿದೆ
ಯಾವ ದಾರಿಯಲ್ಲೂ ಹಾದಿ ಕಾಣದಲ್ಲೊ
ತುಕಾ- ಹಾದಿ ತೋರಿದವ ನೀನೆ ಗುರು
ನಿನ್ನ ಹಾದಿ ಇಲ್ಲೆಲ್ಲು ಇಲ್ಲಾವಲ್ಲೋ

6
ನೂಕೊ ನರಕಕ್ಕೆ ಈ ಜ್ಞಾನವನ್ನ
ನೂಕೊ ನರಕಕ್ಕೆ ಈ ಅರಿವನ್ನ
ನನ್ನಾ ಮನಸು ತಂಗಲಿ
ವಿಠಲಾ ನಿನ್ನ ಪಾದದಲಿ
ನೂಕೊ ನರಕಕ್ಕೆ ಈ ವಿನಯವನ್ನ
ನೂಕೊ ನರಕಕ್ಕೆ ವಿವೇಕವನ್ನ
ನನ್ನಾ ಮನಸು ನಿಲ್ಲಲಿ
ವಿಠಲಾ ನಿನ್ನ ಪಾದದಲ್ಲಿ
ನೂಕೊ ನರಕಕ್ಕೆ ಈ ಕೀರ್ತಿಯನ್ನ
ನೂಕೊ ನರಕಕ್ಕೆ ಈ ಖ್ಯಾತಿಯನ್ನ
ನನ್ನಾ ಮನಸು ಕೂಡಲಿ
ವಿಠಲಾ ನಿನ್ನಲ್ಲಿ
ನೂಕೊ ನರಕಕ್ಕೆ ಈ ದೇಹವನ್ನ
ನೂಕೊ ನರಕಕ್ಕೆ ಬಂಧನವನ್ನ
ನನ್ನ ಗಂಟಲಲ್ಲಿ ನಿಂದೇ ಉಸಿರು
ಮೈ ಮರೆತೆ ನಿನ್ನಾ ಸುಕದಲ್ಲಿ ಸೋತು
ತುಕಾನ ನುಡಿಯಿದು ಸೋಸಲೆಬೇಕು
ನನ್ನಾ ಮನಸು ವಿಠಲನಲ್ಲಿ ಮರೆತು

7
ನಗೋದು ಢೋಂಗಿನೆ ಅಳೋದು ಢೋಂಗಿನೆ
ಉರುಳೋದು ಢೋಂಗಿನೆ ಸೊಗಲಾಡಿ ಮುಂದೆ
ನಂದೂ ನಾಟಕ ನಿಂದೂ ನಾಟಕ
ನಟನೆ ಹಿಡಿಯೊ ಜಾಡೆಲ್ಲ ನಾಟಕ
ಸೋಗಿನ ಹಾಡು ಸೋಗಿನ ಪೂಜೆ
ಸೋಗುಗಳೆಲ್ಲಾ ನಟನೆಯೆ ತಾನೇ
ಢೋಂಗಿ ರಕ್ಷಕ ಢೋಂಗಿ ವಿರಾಗಿ
ಜಗತ್ತು ಸುಳ್ಳಂತ ನಟಿಸೊ ಸನ್ಯಾಸಿ
ಸೋಗು ಭಕ್ತಿಯ ತುಕಾ ಢೋಂಗಿಲಿಂಗಿ
ಸೋಗಲಾಡಿ ಮುಂದೆ ಅವನ ಮಾತೂ ಸೋಗೆ

8
ಮೇಣಕ್ಕಿಂತಲೂ ಮೆದುಜನ ನಾವು
ವಜ್ರ ಒಡೆಯುವ ಗಟ್ಟಿಗರು
ಒಳ್ಳೇವ್ರಿಗೆ ಲಂಗೋಟಿನು ಬಿಚ್ಚಿಕೊಡುತೀವಿ
ಕೇಡಿಗಳ ದೊಣ್ಣೇಲಿ ಕೆಡವಿ ಹಾಕುತೀವಿ
ಅಪ್ಪ ಅವ್ವರಿಗಿಂತ ಹೆಚ್ಚು ಹಚ್ಚಿಕೊತೀವಿ
ವ್ಶೆರಿಗಿಂತ ಜೋರು ಪೆಟ್ಟು ಕೊಡುತೀವಿ
ಅಮೃತ ನಮ್ಮುಂದೆ ಎಂತಾ ಸೀ ತಗೀ
ಕಡು ವಿಷಕ್ಕಿಂತ ನಾವ್ ಕಹಿಕಹಿ ಬಗೀ
ತುಕಾನ ನುಡಿಯಿದು ಹಿತಮಿತ ನಾವು
ಇಷ್ಟಪಟ್ಟಂಥವರ ಇಷ್ಟದ ತಾವು

9
ಹೊಲೆಯನ ಮೈ ತಗುಲಿ ಹಾರುವ ಬ್ರಾಹ್ಮಣ
ಬ್ರಾಹ್ಮಣನಲ್ಲ
ಮಾಡಬಾರದ ತಪ್ಪು ಮಾಡಿದ್ದು ತಪ್ಪು
ಜೀವ ತಕ್ಕೊಬೇಕು ತಗುಲಿದಂತೆ ಶಾಪ
ಚಂಡಾಲನ ಮುಟ್ಟಲು ಒಪ್ಪದ ಮನಸು
ಕಲುಷಿತ ಮನಸು
ತುಕಾನ ನುಡಿ ನಂಬಿದ ನಂಬಿಕೆಯಂತೆ
ಚೊಕ್ಕನಿದ್ದರೆ ಮಾತ್ರ ಅವನು ಪಕ್ಕಾ

10
ನೀನೇ ನನ್ನಾ ತಾಯಿ
ನಿನ್ನಾ ನೆರಳಲ್ಲಿ ದಣಿವಿಲ್ಲ ಮಾಯಿ
ಕಾದಕೂತೆ ನಿನಗೆ ಓ ಪಾಂಡುರಂಗ
ಒಬ್ಬಳೇ ಒಬ್ಬಳು ನೀನೊಬ್ಬಳೆ ನನಗೆ
ದೊಡ್ಡವಳು ಚಿಕ್ಕವಳು ಎಲ್ಲಾ ನನಗೆ
ನೀನೊಬ್ಬಳೆ ನೆಂಟಳು ಉಳಿದಿರುವಳು
ತುಕಾ ನುಡಿದ ನಿನ್ನಲ್ಲೆ ಮನಸು ತಂಗೋದು
ಉಳಿದುದೆಲ್ಲ ಖಾಲಿ ಖಾಲಿ ಬಯಲು

11
ನಿನ್ನಾಳು ತುಕಾ ಬೇಡಿಕೋತೀನಿ
ನನ್ನಪ್ಪ ನೀನು ಮರೀಬೇಡಪ್ಪಾ

ನಿನ್ನ ಹೆಬ್ಬಾಗಿಲಲ್ಲಿ ಬಿದ್ದಿರುವಂಥಾ
ಇಂದಿಗು ಎಂದಿಗು ಪೊರಕೆ ಕಣಪ್ಪಾ
ನಿನ್ನ ಕಾಲಿಗೆ ನನ್ನಾ ಮೈ ಮನಸು
ಒಳ್ಳೆ ಒಪ್ಪುವಂಥಾ ಎಕ್ಕಡವಪ್ಪಾ
ನೀ ಉಗುಳೊ ಎಲೆ ಅಡಿಕೆ ಬಟ್ಟಲಿನಂತೆ
ತೆರಕೊಂಡ ನನ ಬಾಯಿ ನಿನಗಾಗಪ್ಪಾ
ನಿನ್ನ ಹೇಲು ಉಚ್ಚೆ ಮಂಕರಿಗಯ್ಯ
ತಗೋ ನನ್ನ ಮೈಯ್ಯ ಬಳಸಿಕೋಳಪ್ಪಾ
ನಿನ್ನ ಕಾಲು ಮುಟ್ಟಿ  ಮುತ್ತಿಕ್ಕುವಂಥಾ
ಧೂಳಿನ ಕಣ ನಾನು ತುಳಿದು ಹೋಗಪ್ಪಾ
ತುಕಾನ ನುಡಿಯಿದು ಪಂಢರಿರಾಯಾ
ಇದಕಿಂತಲೂ ಬೇರೆ ನಡೆಸಿಕೋಬೇಡ

12
ಪದಕಟ್ಟಿ ಹಾಡಿದರೆ ಬೆನ್ನು ಹಾಕುತಿಯಲ್ಲಾ
ತಿಳಕೊಂಡೆ ಬುಡು ನಿನ್ನ ಮನಸು ಎಂಗಂತಾ
ಬಯಸಿದ್ದು ಪಡಿಲಿಲ್ಲ, ನಿನ ಕಂಡು ಹಿತವಿಲ್ಲ
ನನ ರೀತಿ ನಿನದಲ್ಲ, ನಾ ನಿಂಗೆ ಮೆಚ್ಚಿಲ್ಲ

ಹಾಡಿಗೆ ಕಿವಿಗೊಟ್ಟು ಕೇಳೋ ನಿನ ಸೋಗು
ಮನಸೆಲ್ಲೋ ಬಿಟ್ಟು ಬರಿದೆ ನಟನೆಯಲ್ಲ
ತುಕಾ ಇಡು ನಿನ್ನಾ ಮ್ಯಾಲೊಂದ್ಕಣ್ಣು
ಬಿಡುವಿಲ್ಲದೆ ಅಲೀತದೊ ನಿನ್ನಾ ಮನಸು

13
ಅತ್ತೂ ಕರೆದು ಇನಾಮು ಪಡೆಯುತ್ತಿ
ಇದು ಯಾವ ಘನ ವಡವೆ ಗೊತ್ತಾ?
ಇಷ್ಟ ಪಟ್ಟು ದೇವ ಕೈಯೆತ್ತಿ ನೀಡಿದರೆ
ಕೊನೆ ಇಲ್ಲವೋ ಅದರ ಆನಂದ !
ಬಿತ್ತಿದರೆ ಬೆಳೆವುದು ಹೊಲ ತುಂಬ ಫಸಲು
ಬಿಕ್ಕೆ ದಾನಕ್ಕೆ ಮಾರಾಟ ಬಿತ್ತನೆಗೆ
ತುಕಾನ ನುಡಿಯಿದು ಒಂದಷ್ಟು ಕಾಲ
ಸಹಿಸದೆ ಕಾಯದೆ ಹೇಗಾಗುವುದೊ ಮುತ್ತು?

14
ದಿಟವ ತಿಳಿಯಲೆಂಗೆ
ಕೈಲಾಗದವನಲ್ಲಾ
ನೀನೆ ಮರೆಮಾಚುತಿ ನಿನ್ನಾ ಮುಕ ನಂಗೆ
ನೀ ದೊಡ್ಡವನಲ್ಲಾ !
ಕೂಗಿ ಕೂಗಿ ನಿನ್ನ ಹೊಸಿಲಾ ಬಳಿಯಲ್ಲಿ
ಸುಸ್ತಾಗಿ ಹೋದೆನಲ್ಲೊ
ಯಾರ ಸದ್ದಿಲ್ಲ ಬಯಲ ಮನೆಯಲ್ಲಿ
ದಿಕ್ಕೇಡಿಯಾದೆನಲ್ಲೊ

15
ಕಾಲೆಳೆದುಕೊಂಡು ಹೋಗುವ ಹೆಣ್ಣು
ತವರು ಮನೆ ಬಿಡಲೊಲ್ಲದಂಗೆ
ಪರದಾಡುತೈತೆ ನನ ಜೀವ ನಿನಗಾಗಿ
ಸಂಗ ನಾವು ಮಾಡಿಕೊಂಡಂಗೆ

ಸುತ್ತೆಲ್ಲು ತಾಯಮುಖ ಕಾಣದ ಕಂದಾ
ಸಂಕಟವುಕ್ಕಿ ಅತ್ತಂಗೆ
ನೀರಿಂದ ಮೇಲಕ್ಕೆ ಎತ್ತಿದ ಮೀನು
ತುಕಾ ನನ್ನ ಜೋಡಿ ಇದ್ದಂಗೆ

16
ಪಾಪರ್ರು ಆದದ್ದು ಒಳ್ಳೇದು ದೇವಾ
ಬರದಲ್ಲಿ ನಲುಗಿ ತತ್ತರಿಸಿದ್ದು ಕೂಡಾ
ಕೊನೆಗೆ ಮರುಗಿ ನಿನ್ನಾ ಕಡೆ ಬಂದೆ
ಈ ಜಗವೆ ಹೀಕರಿಕೆ ತಾಣವೋ ನನಗೆ
ಹೆಂಡತಿ ನನ್ನನ್ನು ಬೈಯ್ದದ್ದು ಒಳ್ಳೇದೆ
ಹೆಸರು ಮರ್ಯಾದೆ ದುಡ್ಡು ದನಕರಾ
ಕಳಕೊಂಡಿದ್ದು ಮತ್ತೂ ಒಳ್ಳೇದೆ
ಜನರ ಮಾತಿಗೆ ನಾನಂಜೊ ಕುಳವಲ್ಲ
ಕಾಪಾಡಬೇಕೋ ನೀ ನನ್ನ ದೇವಾ
ನಿನ್ನ ಗುಡಿ ಕಟ್ಟಿಸಿ ಮನೆ ಕಡೆ ನೋಡಿಲ್ಲ
ತುಕಾ ಉಪವಾಸ ಹನ್ನೊಂದು ದಿವಸ
ಎಚ್ಚರ ಉಳಿಸಿದೆ ನನ್ನಾ ಎಚ್ಚರಿಕೆಯಿಂದಾ