ತುಕಾರಾಮನ ಮತ್ತಷ್ಟು ಅಭಂಗಗಳು

1
ಕನಸಿನ ಹಾಗೆ ಕನಸಿನಾ ಹಾಗೆ
ನಾಮದೇವ ವಿಠ್ಠಲ ಬಂದಿದ್ದ ಹಾಗೆ
'ಹುಚ್ಚಾಟ ಬಿಟ್ಟು ಬರಿಯೊ ಅಭಂಗ,
ನಿಂದೀ ಕೆಲಸ!' ಹೇಳಿದ್ದ ನಾಮದೇವ
ಕನಸಿನ ಒಳಗಿನ ಕಣಸಲ್ಲಿ ಎಬ್ಬಿಸಿ
ಬೆನ್ನು ತಟ್ಟಿ ವಿಠ್ಠಲ ನೀಡಿದ್ದ ಲೆಕ್ಕ
'ನಾಮದೇವನ ಲೆಕ್ಕವಿತ್ತು ಶತಕೋಟಿ
ಬರಿಯದೆ ಉಳಿದದ್ದು ತುಕಾನ ಬಾಕಿ!'

2
ಗುಂಯ್ಗುಡೊ ನಿನ್ನಾ ತಾಳಕ್ಕೆ ತಕ್ಕಂತೆ
ತಕತಕ ಕುಣಿವಂಗೆ ಮೈದುಂಬಿಕೊಳ್ಳುತ್ತೆ
ಸೂತ್ರದ ಬೊಂಬೆ ತರಹ ನನ್ನಾ
ಕುಣಿಸುತ್ತಿ ತಾ ದಿಮ್ಮಿ ಥಕ್ಕಥಯ್ಯಾ
ನಿನ್ನದೆ ಹೆಸರು ಮೈಮಾಟ ಬಣ್ಣ
ನನ್ನಲ್ಲಿ ಮಿಡಿದು ಬಂತು ಜೀವಂತ
ತುಕಾನ ನುಡಿಯಿದು ಪಾಂಡುರಂಗಾ
ಎಂದಿಗು ನೆರೆದಿರುವ ನನ್ನ ಸುತ್ತಾ

3
ನನ್ನ ನಿನ್ನಾ ನಡುವೆ ಯಾ ಭೇದವಿಲ್ಲ
ಸುಮ್ಮನೆ ತಮಾಷೆ ನಾ ಮಾಡುತಿನಲ್ಲ
ನನ್ನಂತೇನೆ ನಿನ್ನಾ ಆಕಾರ ರೂಪಾ
ನೀ ಬಯಸಿ ನನ್ನ ಹಿಗ್ಗಿಸುತ್ತೀಯಾ
ನಾನೇ ನಿಜವಾಗಿ ನಿನ್ನೊಳಗೆ ಕೆಳಗೆ
ನೀನೇ ಓಡಾಡುತ್ತಿ ನನ್ನಿಂದಾಚೆಗೆ
ನಾ ನಿಂತೆ ನಿನ್ನಲ್ಲಿ ಅಲುಗದ ಹಾಗೆ
ನಿನ್ನಾ ಇಚ್ಛಾಬಲ ಒಂದೇ ನನ್ನೊಳಗೆ
ನನ್ನ ಬಾಯಲ್ಲಿ ನಿಂದೇ ಮಾತು
ನಿನ್ನಲ್ಲೆ ಉಳಿದೆ ನಾ ತಣ್ಣಗೆ ಕೂತು
ತುಕಾನ ನುಡಿಯಿದು ಓ ದೇವರ ದೇವಾ
ನಮ್ಮ ಹೆಸರು ಕಲಸಿಹೋಗಿದೆಯಲ್ಲಾ

4
ನರಿಯನ್ನು ಕಂಡು ಹುಲಿಯಂತು ಹೀಗೆ-
'ನಿನ್ನ ತಿಂದರೆ ನಾನು ಬೇಸರಿಸುತ್ತೀಯಾ?
ನೀ ಸಾಯುವವ ಅಂತಾನೆ ನಂಗೊತ್ತು ಬಿಡು
ಹಸಿವಿಂದ ಸಾಯಲು ನಂಗ್ಯಾಕೆ ಬಿಡುತಿಯಾ'
ಹುಲಿಯ ಮಾತಿಗೆ ನರಿ ಅಂತು ಪ್ರತಿಮಾತು-
'ನಿನ್ನ ಮಾತಲ್ಲಿ ಒಂಚೂರೂ ಸುಳ್ಳಿಲ್ಲ
ಸಾವೇ ನಿಜ ಈ ಮೈಗೆ ಒಂದಲ್ಲ ಒಂದಿನ
ನೀನ್ಯಾಕೆ ಆತ್ಮ ತ್ಯಾಗ ಮಾಡಿಕೊಂಡಿಲ್ಲಾ?'
ಹುಲಿ ನರಿಯ ಮಾತು ನರಿ ಹುಲಿಯ ಮಾತು
ಒಬ್ಬರೊಬ್ಬರ ಮಾತು ಕೇಳಿ ತಿಳಕೊಂಡ್ತು.
ತುಕಾನ ನುಡಿಯಿದು ತಂತುಗಾರರು ಕೂಡಿ
ಆಗುವುದೇನಂತಾ ಚೆನ್ನಾಗಿ ಗೊತ್ತು.

5
ಕುಣುಬಿಯಾಗಿ ಹುಟ್ಟಿಸಿ ಒಳ್ಳೇದೆ ಮಾಡಿದೆ
ಕಪಟಿಗಳ ಕೈಯಲ್ಲಿ ನಾಶವಾಗುತ್ತಿದ್ದೆ
ಓದು ಬರಹ ನಂಗೆ ಸಂಕಟ ತರುತ್ತಿತ್ತು
ಸೊಕ್ಕಿನ ದಾರೀಲಿ ನರಕ ತುಳಿಸುತ್ತಿತು
ತುಕಾ ನುಡಿದ-
ವೇದದ ಗಿಳಿಪಾಠಕ್ಕೆ ನೀವೇ ಹೋಗಿ
ನನ್ನ ದಾರಿಗೆ ಮಾತ್ರ ಅಡ್ಡ ಬರಬೇಡಿ

6
ಬೈಗೂ ಬೆಳಗೂ ಒಂದೇ ಸಮ ಯುದ್ಧ
ಈ ಜಗಕೂ ನನಗೂ ನಡುವೆ ಯುದ್ಧ
ಏಕದಂ ಎರಗಿದರೂ ಎಚ್ಚರ ತಪ್ಪಲ್ಲಾ
ಗಟ್ಟಿ ನಿಲ್ಲದೆ ನಾವು ಹಾಗೇ ಬಿಡಲ್ಲಾ
ಎಲ್ಲರ ಬೆದರಿಸೊ ತುಕಾನ ನುಡಿಯಿದು
ಬಲ ಬಂತೊ ಬಲಾ, ನಿನ್ನಾ ಹೆಸರಿಂದ

7
ತಿನ್ನಲಿ ಏನೀಗ ಎಲ್ಲಿಗೆ ಹೋಗಲಿ?
ಯಾರಲ್ಲಿ ಉಳಿಯಲಿ ಈ ಊರಿನಲ್ಲಿ?
ಸಿಟ್ಟಿಗೆದ್ದ ಪಾಟೀಲ ಊರ ಈ ಜನ
ನೀಡುತಾರ ನಂಗೆ ತುತ್ತು ಅನ್ನದಾನ?
ಮರುವಾದೆ ಗೆಟ್ಟವ ಅಂತ ದೂರುತಾರೆ
ನ್ಯಾಯಕಟ್ಟೆಗೂ ನನ್ನಾ ಎಳೆಯುತಾರೆ
ಸಭ್ಯಸ್ಥ ಜನರೇ ಸೆಟೆದು ನಿಂತವರೆ
ಕೈಲಾಗದವನಾ ಮ್ಯಾಲೆ ಕೈ ಎತ್ತವರೆ
ತುಕಾನ ನುಡಿಯಿದು ಬೇಡಿವರ ಸಂಗ
ವಿಠ್ಠಲನ ಹುಡುಕುತ ಹೋಗುವಾ ಈಗ

8
ಅರಿವಿನ ದೇವಾ ನಿನ್ನಲ್ಲೇನೊ ದೋಷ
ಕಲ್ಲಿಂದ ನೀನ್ಯಾಕೆ ಮುಚ್ಚಿ ಹೋಗಿರುವಿ?
ನಿನ್ನಾ ಗುಡಿಯಲ್ಲೆ ಜೀವಾ ಬಿಡುತೀನಿ
ದೇವ ನನ್ನ ಹತ್ಯೆ ನಾ ಮಾಡಿಕೊತೀನಿ
ಓ ತಾಯಿ ವಿಠಬಾಯಿ ನಂಬಿದ್ದೆನವ್ವ
ನಾನಿರುವುದೆಲ್ಲ ನಾಶ ಮಾಡುತಿನವ್ವ
ತುಕಾನ ನುಡಿಯಿದು ಹೊರಟುನಿಂತಿವಿನಿ
ನನ್ನಾ ಜೀವಾ ನಿಂಗೆ ಬಿಟ್ಟುಬಿಡುತಿನಿ

9
ನಾ ದೈವ ಅಂತಾನೆ ಜನ ತಿಳಿತಾರಲ್ಲ
ಅಯ್ಯೋ ಈ ಪಾಪ ಬರಿಯ ಪಾಪವಲ್ಲ್ಲ
ದಂಡಿಸೋ ದೇವಾ ದಂಡಿಸೋ ನನ್ನಾ
ಹಿಡಕೋ ನನ್ನ ತಲೆ ಹಿಡಕೊಳ್ಳೋ ಚೂರಿ
ಪೂಜೆ ಮಾಡುತಾರೆ ನಂಗೇ ಅವರೆಲ್ಲ
ಅಂಥ ಹಕ್ಕಿಲ್ಲವೊ ನಂಗ್ಯಾವ ಹಕ್ಕಿಲ್ಲ
ಓ ಯಪ್ಪಾ ಯವ್ವಾ ತುಕಾನ ಮಾತಿದು
ಪಾಪ ಅಂತಾ ಗೊತ್ತೊ ನನ್ನಾ ಮನಸಿಗು

10
ಗೀಚುತೀನಿ ಮತ್ತೆ ಒಡೆದು ಹಾಕುತೀನಿ
ನಿನಗಿಷ್ಟವಾಗೋದನ್ನೆ ಹುಡುಕುತೀನಿ
ನಿನ್ನ ಪರೀಕ್ಷೆ ನಾ ಪಾಸಾಗಲೆಬೇಕು
ನನ್ನೀಪದ ದೇವಾ ಉಳಿಯಲೇ ಬೇಕು
ಪದ ಪದ ಅಳಿಸಿ ಬದಲಿಸಿ ಇಡುತೀನಿ
ಮತ್ತೆ ಮತ್ತೆ ನಿನಗೆ ಕೈ ಜೋಡಿಸುತೀನಿ
ತುಕಾ ನುಡಿದ ಕೊನೆಗೆ ಮಾತಾದರು ಆಡು
ಈ ಪದ ಎಂಥದೊ ಏನೊ ನುಡಿಬೋದು

 # #